سپیکر قومی اسمبلی نال سعودی عرب دے سفیر دی پارلیمنٹ ہاؤس اچ ملاقات

اسلام آباد۔23اپریل (اے پی پی):سپیکر قومی اسمبلی سردار ایاز صادق نال سعودی عرب دے سفیر نواف بن سعید احمد المالکی پارلیمنٹ ہاؤس اچ ملاقات کیتی جیں اچ ݙوہیں پاسوں پاک سعودی تعلقات تے اطمینان دا اظہارتے انہاں کوں مزید ودھاوݨ دے عزم د اظہار کیتے ڳئے ۔ سپیکر سعودی سفیر نال ڳالھ کریندے ہوئیں آکھیے پاکستان سعودی عرب نال آپݨے پراݨے برادرانہ تعلقات کوں وݙی اہمیت ݙیندے ۔پاک سعودی تعلقات مذہب ، ثقافت ،تاریخ اتے سانجھے اعتماد و احترام دے اٹوٹ رشتے اچ گھنڈیے پئن ۔ پاکستان دی عوام سعودی عرب اتے خادمین حرمین الشریفین نال گہری وابستگی رکھیندی اے ۔ انہاں آکھیے ݙوہیں بھرا ملک اہم عالمی اتے علاقائی ایشوزتے ھکو سواں موقف رکھیندن ݙوطرفہ تعلقات کوں مزید مستحکم بݨاوݨ سانڳے پارلیمانی سفارتکاری اہمیت رکھیندی اے ۔پارلیمانی وفد دے تبادلیں تے پارلیمانی فرینڈشپ گروپس وچال رابطے ݙوہیں کوں مزید نیڑے گھن آوݨ اچ معاون ثابت تھیسن۔ ݙوہیں بھرا اسلامی ملکاں اوکھے ویلھے ھک ݙوجھے دا ساتھ ݙتا ۔سعودی عرب دا پاکستان دی معاشی و اقتصادی ترقی سانڳے تعاون قابل ستائش اے۔سعودی عرب دی طرفوں پاکستان اچ سرمایہ کاری دے عزم دا خیر مقدم کریندوں ۔سپیکر قومی اسمبلی سعودی مجلس شوری دے چیئرمین ڈاکٹر عبداللہ بن محمد بن ابراہیم الشیخ کوں پارلیمانی وفد دے رلے پاکستان دورے دی دعوت ݙتی ۔ سعودی سفیرنواف سعید المالکی سپیکر قومی اسمبلی دی طرفوں سعودی عرب نال گھاٹی جڑت ، خادمین حرمین الشریفین سانڳے نیک تمناؤں تے ݙو پاسے تعلقات ودھاوݨ دی خواہش تے اظہار تشکر کیتے تے آکھیے جو سعودی عرب پاکستان نال آپݨے تعلقات اہمیت ݙیندے۔

مضمون کا ماخذ : میگا ملینز آن لائن ٹکٹ

متعلقہ مضامین