حڪومت عوام کي صحت جون بهترين خدمتون فراهم ڪرڻ تي ڀرپور ڌيان ڏئي رهي آهي: خاتون اول بيگم ثمينه عارف
APP02-301221
KARACHI: December 30 - Begum Samina Arif Alvi addressing during prize distribution ceremony of Poster Competition for Physical Wellness organized by Iqra University (IU), North Campus. APP Photo by Saeed Qureshi
ڪراچي – 30 ڊسمبر (اي پي پي) خاتون اول بيگم ثمينه عارف چيو آهي ته موجوده حڪومت عوام کي صحت جون بهترين خدمتون فراهم ڪرڻ تي ڀرپور ڌيان ڏئي رهي آهي، شاگرد پنهنجي پڙهائي جي عملي رخن ۽ دائري ڪار تي هڪجهڙو ڌيان ڏين ته جيئن تعليم مڪمل ڪرڻ کانپوءِ کين ملازمتون ملي سگهن، اقرا يونيورسٽي جي انتظاميه عوامي آگاهي جي لاءِ گهٽ مراعته يافته علائقن ۾ به صحت بابت آگاهي ڪيمپ لڳائي. اهڙن خيالن جو اظهار هن اقرايونيورسٽي نارٿ ڪيمپس جي شاگردن ۽ فيڪلٽي ميمبرن سان يونيورسٽي جي اهتمام هيٺ جسماني تندرستي جي حوالي سان پوسٽر سازي مقابلي جي موقعي تي خطاب ڪندي ڪيو. خاتون اول بيگم ثمينه عارف علوي پوسٽر سازي مقابلي جي انعقاد تي شاگردن، فيڪلٽي ميمبرن ۽ اقرا يونيورسٽي جي انتظاميه کي ساراهيو. هن چيو ته شاگردن جي تيار ڪيل پوسٽرز معلوماتي آهن، صحت ۽ تندرستي جي باري ۾ آگاهي جي حوالي سان وڌيڪ مفيد ٿي سگهن ٿا. هن چيو ته ان قسم جي پوسٽرز کي اسڪولن ۾ به لڳائڻ گهرجي ڇو ته اهي شاگردن ۾ جسماني تندرستي کي برقرار رکڻ لاءِ احتياطي تدبيرن جي باري ۾ بيداري پيدا ڪرڻ جي لاءِ وڌيڪ مفيد ثابت ٿيندا. هن شاگردن جي مسڪرائيندڙ چهرن کي ڏسي خوشي جو اظهار ڪندي چيو ته ان مان انهن جي پڙهائي ۾ جوش ۽ دلچسپي ظاهر ٿئي ٿي. بيگم ثمينه عارف علوي اقرا يونيورسٽي جي شاگردن کي به مشورو ڏنو ته هو خصوصي ٻارن ۾ بهترين صحت برقرار رکڻ لاءِ احتياطي تدبيرن جي باري ۾ آگاهي پيدا ڪرڻ لاءِ به ڪم ڪن. خاتون اول بيگم ثمينه عارف علوي چيو ته معذور ٻارن کي به اسان سڀني جي تعاون جي ضرورت آهي، مختلف صلاحيتون رکندڙ ٻار به عام زندگي گذارڻ ۽ معاشري جو ڪارآمد شهري بڻجڻ لاءِ همدردي حاصل ڪرڻ جا مستحق آهن. خاتون اول چيو ته اقرا يونيورسٽي جي انتظاميه عوام ۾ آگاهي پيدا ڪرڻ لاءِ گهٽ مراعته يافته علائقن ۾ به صحت بابت آگاهي ڪيمپ لڳائي. هن چيو ته موجوده حڪومت عوام کي صحت جون بهترين خدمتون فراهم ڪرڻ لاءِ به ڀرپور ڌيان ڏئي رهي آهي. ان کان اڳ هن پوسٽر سازي مقابلي جو جائزو ورتو ۽ شرڪت ڪندڙن جي تيار ڪيل پوسٽرز ۾ گهري دلچسپي ورتي، ان موقعي تي اقرا يونيورسٽي پاران خاتون اول بيگم ثمينه عارف علوي کي شيلڊ به پيش ڪئي وئي، ان کانپوءِ بيگم ثمينه عارف علوي پوسٽر مقابلي جي فاتح ۽ رنراپ کي شيلڊز ڏنيون.
