اڄ جنهن وٽ موبائيل آهي اهو وي لاگر ۽ يوٽيوبر بڻجي وڃي ٿو، سوشل ميڊيا جي لاءِ قاعدا ۽ ضابطا ضروري آهن: وفاقي وزير عطاءُ الله تارڙ

لاهور – 15 – آگسٽ (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته اڄ جنهن وٽ موبائيل آهي اهو وي لاگر ۽ يوٽيوبر بڻجي وڃي ٿو، سوشل ميڊيا جي لاءِ قاعدا ۽ ضابطا ضروري آهن. هو سينيئر صحافي، پنجاب اسيمبلي جي پريس گيلري جي صدر اخلاق باجوه مرحوم جي گهر وڃي گهرڀاتين سان ملاقات ۽ فاتحه خواني کانپوءِ صحافين سان ڳالهائي رهيو هو. وفاقي وزير چيو ته اخلاق باجوه سان سٺي خراب وقتن جو ساٿ رهيو، هو هڪ فرض شناس ۽ ديانتدار صحافي هو، اهڙو صحافي جيڪو ٻين جي مشڪل ۾ ڏک ونڊڻ ڄاڻيندو هو. سندس پورو ڪيريئر ڏٺو وڃي ته هن فرض شناسي ۽ انتهائي ايمانداري سان گذاريو، کيس سدائين ٻين جي مشڪل ۾ اڳتي وڌي مدد ڪندي ڏٺو. هو اسان کي به ڪو مشورو ڏيندو هو ته انتهائي خلوص سان ڏيندو هو ۽ تمام سٺي رهنمائي ڪندو هو. هن چيو ته سندس خاندان جو اسان جي مٿان حق آهي ۽ انهن جي سارسنڀال ڪرڻ اسان جي فرضن ۾ شامل آهي. هن چيو ته صحافت ڪرڻ آسان ڪم ناهي هوندو، سخت موسم ۾ ڊيوٽي سرانجام ڏيڻ خلق خدا جي خدمت آهي. هن چيو ته پنجاب اسيمبلي جي اسپيڪر ملڪ محمد احمد خان اخلاق باجوه مرحوم جي هڪ پٽ جي نوڪري جي حوالي سان اعلان ڪيو آهي، اسان 25 لک رپيا فڪس ڊپازٽ ڪرائي رهيا آهيون ۽ ٻئي ڏينهن تائين امانت انهن جي حوالي ڪنداسين ته جيئن ٻارن جي پڙهائي ۽ ٻين معاملن ۾ ڪا رڪاوٽ نه اچي. هن چيو ته آئون چاهيان ٿو ته هڪ ڪميٽي جوڙي وڃي، اسان ڪو پروگرام شروع ڪريون جيڪو حڪومت جو پروگرام به ٿي سگهي ٿو ان کي اخلاق باجوه جي نالي سان منسوب ڪريون، پريس ڪلب جي اندر ڪو حال، ڪنهن سرڪاري عمارت کي به اخلاق باجوه جي نالي سان منسوب ڪري سگهجي ٿو ته جيئن سندس ياد زندهه رهي. هن وڌيڪ چيو ته وفاقي حڪومت هيلٿ انشورنس جو پروگرام شروع ڪيو آهي، اسان مختلف ادارن جون اشتهارن جي مد ۾ 1.6 ارب جون رهتون ادا ڪيون. اسان چيو آهي ته جيتريون به رهتون آهن اهي ادا ڪيون وينديون، اسان ادارن کي چيو آهي ته اهي پنهنجي ملازمن جي پگهارن ۾ اضافو ڪن. آئون جڏهن به مالڪن يا سينيئر مئنجمينٽ سان ملندو آهيان آئون رڳو اهو ئي چوندو آهيان ته پنهنجي ورڪز جون پگهارون ادا ڪن. انهن اخبارن تي ٽيڪس لڳڻ نه ڏنا، جيڪڏهن اهي ٽيڪس لڳي وڃن ها ته اخبارن مان هزارين ماڻهو بيروزگار ٿي وڃن ها. هن چيو ته ميڊيا ورڪرز جو استحصال نه ٿيڻ گهرجي پر ادارا ويلفيئر جي لاءِ ڪم ڪن. اسان هيلٿ انشورنس شروع ڪئي آهي ۽ پهرين مرحلي ۾ 10 هزار صحافي فائدو کڻندا، انشورنس جي پريميم جي ادائيگي ڪري چڪا آهيون. لاهور پريس ڪلب جي گرانٽ جي حوالي سان هن چيو ته اطلاعات واري صوبائي وزير عظميٰ بخاري سان ڳالهه ڪندس. هن چيو ته اسان ته چاهيون ٿا ته لائيف انشورنس به هجي، حڪومت تيار آهي، ادارا اچن ۽ ان ۾ پنهنجو حصو وجهن ته جيئن اهڙي طرح جو ڪو واقعو ٿئي ته ڪنهن جي ڪفالت جي لاءِ اعلان نه ڪرڻا پون. هڪ سوال جي جواب ۾ هن چيو ته اڄ جنهن وٽ موبائيل آهي اهو وي لاگر ۽ يوٽيوبر بڻجي وڃي ٿو، سوشل ميڊيا جي لاءِ قاعدا ۽ ضابطا هجڻ گهرجن، جڏهن به ان جي لاءِ ڪو قدم کڄي ٿو ته اهو چيو وڃي ٿو ته اظهار راءِ جي آزادي تي پابندي لڳي رهي آهي، ان جي لاءِ ڪا نه ڪا اهڙي باڊي ٺاهڻي پوندي ته جيئن انهن کي ايڊيٽوريل ڪنٽرول جي اندر آندو وڃي.

مضمون کا ماخذ : فائر جوکر

متعلقہ مضامین